Waray makalusot ha mga otoridad an duha nga kalalakin-an mahuman hira makuhaan hin gin aaligar shabu ngan pusil ha ginbuhat nga buy-bust operation ha Sitio Lawis, Barangay Poblacion, Albuera, Leyte, kakulolop, September 1, 2026.
Ginkilala an mga drug suspect nga hira alyas “Enzo,” 47-anyos, ngan alyas “Kano,” 20-anyos, pareho mga residente han Brgy. Poblacion, Albuera, Leyte.
Ha mao nga operasyon, sumatutal lima (5) kapakete hin gin aaligar shabu an nakumpiskar tikang ha mga suspek, nga mayada ginbabana bana timbang nga 22.48 grams, ngan Dangerous Drugs Board (DDB) value nga P152,864. Narekober gihapon an usa ka pistol-type revolver nga mayada lima ka bala, usa ka itom nga inside holster, usa nga weighing scale, usa ka sling bag, ngan an gin-gamit nga buy-bust money.
Hapsay naman nga ginmarkahan, gin-imbentaryo, ngan gindokumento an mga nakuha nga ebidensya ha presensya han mga ginkikinahanglan nga testigo. Ginpasa an gin aaligar shabu ha Regional Forensic Unit 8 para han laboratory examination, samtang an narekober nga armas in ginpasa para han ballistic examination.
Gindara an mga naaresto nga suspek ha Albuera Municipal Police Station para han dokumentasyon ngan sakto nga disposisyon.
Gin aandam na gihapon an mga reklamo ha pagtalapas han Sections 5 (Illegal Sale of Dangerous Drugs) and 11 (Illegal Possession of Dangerous Drugs), Article II of Republic Act No. 9165, o Comprehensive Dangerous Drugs Act of 2002, ngan
Republic Act No. 10591, o an Comprehensive Firearms and Ammunition Regulation Act, kontra ha mao nga mga suspek.
Source: RMN Tacloban