Padayon nga ginpapakusog han Department of Social Welfare and Development Field Office 8 (DSWD-8) an koordinasyon hini ha Leyte Police Provincial Office (LPPO) agud maparig-on an seguridad ha Regional Rehabilitation Center for Youth (RRCY).
Ha ginbuhat nga coordination meeting han Hulyo 3, ginhimangrawan han duha nga ahensya an mga security protocol ngan response procedures ha panahon han mga insidente ha sulod han RRCY, agud masiguro an seguridad han pasilidad, mga empleyado, ngan mga residente.
Gintambongan an miting nira DSWD-8 Regional Director Grace Q. Subong, LPPO Officer-in-Charge Police Colonel Celerino M. Sacro Jr., Police Lieutenant Colonel Jennifer L. Medalla, Chief han Police Community Affairs and Development Unit, ngan iba pa nga mga opisyal han DSWD ngan RRCY.
Sumala ha LPPO, padayon an pakigkoordinar han kapulisan ha mga ahensya han gobyerno agud maparig-on an seguridad ngan mapauswag an serbisyo para ha publiko.
Source: RMN Tacloban