Waray lusot ha mga otoridad an usa nga drug suspect mahuman ini makuhaan hin pira kapakete hin gin aaligar shabu ha ginbuhat nga buy-bust operation ha Poblacion Zone 1, Baybay City, Leyte, kakulop han gab-i, June 25, 2026.
Ginkilala an suspek ha alyas nga “Brian,” 38-anyos nga residente han pareho nga barangay. Hiya in naaresto mahuman an pagbaligya hin usa (1) kapakate hin gin aaligar shabu ha usa nga police poseur-buyer ha mao nga operasyon.
Durante hini, nakompiskar tikang ha suspek an dugang nga lima (5) kapakete hin gin aaligar shabu, tin can container, ngan an marked money nga gin gamit ha operasyon.
Ginbabana bana nga natimbang hin 2.9 grams an nakompiskar nga gin aaligar shabu, ha ginbabana bana nga kantidad hin P19,720.
Ginmarkahan naman ngan gin imbentaryo an mga narekober nga ebidensya ha lugar han pag aresto, ha presensya han suspek mismo ngan han mga ginkikinihanglan nga mga testigo.
Gindara an mao nga suspek ha Baybay City Police Station para han dokumentasyon ngan sakto nga disposisyon, ngan yana naatubang hin kaso ha pagtalapas han Section 5 (Illegal Sale of Dangerous Drugs) and Section 11 (Illegal Possession of Dangerous Drugs) han Article II of Republic Act No. 9165.
Source: RMN Tacloban