Waray lusot ha mga otoridad an duha nga lalaki mahuman mabungkag an ira drug den ngan makuhaan hin gin aaligar shabu ha ginbuhat nga buy-bust operation ha Brgy. Cantandog 1, Hilongos, Leyte, kakulop, Mayo 22, 2026, banda alas 10:45 han gab-i.
Ginkilala an mga drug suspect nga hi alyas “Del,” 30-anyos nga parag-uma, residente han Brgy. Cantandog-1, Hilongos, ngan hira alyas “Mek,” 24-anyos nga wifi installer, ngan alyas “Jel,” 21-anyos nga motorpot driver, pareho mga residente han Brgy. Dulho, Bato, Leyte.
Ha mao nga operasyon, nakompiskar tikang ha mga suspek an upat (4) kapakete hin gin aaligar shabu, P500 nga buy-bust money, duha (2) ka lighter, duha ka strip hin aluminum nga mayada agi hin gin aaligar shabu, usa nga wallet, ngan usa nga driver’s license.
Gin markahan naman ngan gin imbentaryo ha lugar an mga narekober nga ebidensya ha atubangan han mga suspek ngan han mga gin imbitar nga mga testigo.
Samtang, gintutudlok pa han Regional Forensic Unit 8 an timbang ngan kantidad han nakompiskar nga gin aaligar shabu. Gin aandaman na gihapon an pagpasaka hin kaangayan nga kaso kontra ha mga suspek.
Source: RMN Tacloban