Nagdangat sa pagbina-isay ang natalana kuntani nga demolition sa tatlo ka balay sa Brgy 39, Bacolod City.
May steel gate nga ginplastar ang mga pumuluyo nga nagapakilala nga Indigenous People (IP) kag ginbalabagan ang pagpatuman sang demolition order.
Ginpangitaan ni Atty Reuben Sabig sang Temporary Restraining Order (TRO) ang mga pumuluyo, samtang sila ang ginasukot naman sang mga pumuluyo sang Court Order tuhoy sa demolition.
Ang Hiligaynon Sectoral Tribal Community Council, Inc. ang ginrepresentar sang ila chieftain nga si Enrico Nicor.
Sa interview sang Bombo Radyo Bacolod kay Nicor, ginpahayag sini nga sang 1976 pa siya umpisa nga nagpuyo sa lugar.
Apang, bangod sa sunog, siya ang nagsaylo sa bag-o nga pwesto sang 2014.
Nahibaluan nga ang duta ang gina-alegar gindonar sang Lizares Family sa Negros Occidental Provincial Government, apang ini ang ginabawi na bangod wala nagamit sa intended purpose.
Apang sa pagbalik sang duta, dapat wala na sang informal settlers.
Apang panindugan ni Nicor nga sila ang magahalin lamang kun may mapakita nga dokumento natuhoy sa pagpanag-iya sang duta, kag makapakita sang court order.
Depensa sini nga kanselado ang titulo ni Lizares.
Bilang madugay na nga nakapwesto sa lugar, ginakabig nila nga land-grabbing ang patigayunon nga demolition.
Suno diri, naka-atubang na sila sa Provincial Government, kag ini ang nag-untat na, apang sa karun ang Philippine Charity Sweepstakes Office (PCSO) kag City Legal Office naman ang nagahingabot sa ila.
Panindugan niya nga apisar tatlo lang kabalay ang nakabutang sa notice nga idemolish, ini ang nagapati nga panugod lamang ini sa plano nga pagsalama sa ila.
Source: Bombo Radyo Bacolod