Ginpanugyan sang Bureau of Fire Protection Negros Occidental sa publiko nga maghalong bangud sa adlaw-adlaw nga power outage.
Sa interview sang Bombo Radyo kay FSupt. Rodel Legaspi, Acting Provincial Fire Marshal sang BFP Negros Occidental, ginpahayag sini nga ang scheduled brownout nga nagakatabo sa probinsya ang indi na gid malikawan, gani dapat maghalong ang mga pumuluyo sa mga butang nga makatuga sang sunog ilabi na kun gab-i.
Panugyan sini nga kun maggamit sang kandila, sigurohon nga nakasecure ang pantunganan sini.
Bangud suno kay Legaspi, madasig lang maglapta ang kalayo ilabi na kun malapit sa mga kurtina.
Dapat man suno sa iya halongan ang tagsa ka mga panimalay.
Pahayag ni Legaspi, ang fire safety measures ang indi lang respondibilidad sang BFP kundi kasubong man sa tagsa ka mga panimalay.
Ini agud malikawan ang sunog, malikawan nga may mahalitan nga mga propiedad kasubong man agud malikawan nga may mautas ang kabuhi.
Source: Bombo Radyo Bacolod