Naghihingyap hi Northern Samar Rep. Niko Raul Daza nga ig-ugsod an Barangay ngan Sangguniang Kabataan Elections (BSKE) nga nakatalaan buhaton ha Nobyembre 2026. Pinaagi han House Bill No. 10407, iginduso niya nga ibalhin an eleksyon ngadto ha siyahan nga Lunes han Nobyembre 2028.
Ilarom han balaud, an ngatanan nga nakalingkod nga barangay ngan SK officials in magpapabilin ha pwesto ha ilarum hin holdover provision tubtub nga mapili an mga sumurunod ha ira. Iginsuhestyon liwat nga an masunod nga BSKE pagdudumaraon kada upat ka tuig.
Sumala kan Daza, an pag-ugsod han eleksyon maghahatag hin igo nga panahon ha mga barangay officials para matapos an ira mga programa ngan proyekto. Naglalaom liwat hiya nga makakabulig ini ha pagpauswag han pagserbisyo ha mga komunidad.
Ha oras nga magin balaud na an proposisyon, an Commission on Elections (Comelec) ngan Department of the Interior and Local Government (DILG) an maghihimo han implementing rules and regulations. Kun maidadayon, an mga opisyales nga napili dida han Nobyembre 2028 nga BSKE in magtitikang ha Disyembre 1, 2028.
Source: RMN Tacloban