May yara sang multiple stab wounds ang bag-ong bun-ag nga lapsag nga nasapwan nga patay sa sulod sang sako sa Sitio Maaswa, Barangay General Luna, banwa sang Toboso sang Huwebes.
Madumduman nga ang lapsag ang gina-alegar nadiskubrehan sang abyan sang 17-anyos nga babayi sang ginlihog ini nga ihaboy ang sako nga naga-unod sang patay nga kuring.
Suno sa abyan, ginbuksan niya ang sako bangud nagduda ini sa kabug-aton kag didto na niya nakita ang lapsag nga wala na sang kabuhi.
Suno sa abyan, wala siya nakahibalo nga nagabusong ang 17-anyos. Ginapahayag nga may boyfriend ini nga naga-edad sang 20-anyos.
Sa interview sang Bombo Radyo kay Negros Occidental Police Provincial Office (NOCPPO) Spokesperson Police Major Judesses Catalogo, may mga multiple stab wounds sa dughan kag likod nga bahin sang lawas sang lapsag, base sa resulta sang post mortem examination.
Suno kay Catalogo, yara na karon sa kustodiya sang Toboso Municipal Social Welfare and Development Office (MSWDO) ang menor de edad nga iloy sang lapsag.
Suno kay Catalogo, kaso nga infanticide ang posible nga ipasaka batok sa iloy kun mapamatud-an nga may yara ini sang discernment sang ginhimo niya ang krimen.
Source: Bombo Radyo Bacolod