Sa tion sang kasubo kag pagkawala, nagpakita sang pagpakig-angot kag malasakit ang Bacolod City Government pinaagi sa paghatag sang ayuda pinansyal sa mga pamilya nga naapektuhan sang nagkalain-lain nga insidente sang sunog sa siudad sini nga bulan sang Mayo 2026.
Ginpatigayon ang pagpanagtag sang bulig sa Bacolod City Government Center sang Domingo, Mayo 17, kun sa diin personal nga ginbaton sang mga benepisyaryo ang suporta halin sa lokal nga panguluhan.
Nakabaton sang kabug-osan nga Php905,000 nga ayuda ang mga residente nga naapektuhan sang sunog nga nagluntad sang Mayo 7 kag Mayo 12 sa Magnolia, Barangay 7. Samtang Php100,000 naman ang ginpaabot nga bulig sa mga pamilya nga nasunogan sang Mayo 6 sa Barangay Alijis.
Paagi sini nga tikang, ginapakita sang Bacolod LGU ang padayon nga pagserbisyo kag pagbulig sa mga pumuluyo nga nagakinahanglan sang suporta ilabi na sa tion sang kalamidad kag krisis.
Ang inisyatibo nagdala sang paglaum kag kusog sa mga pamilya nga nagapaninguha nga makabangon liwat halin sa trahedya.