Tungod la nga ginsuktan hin ₱150.00 nga sinemana nga hulog para ha utang nga tres mil ngan tarhug ha pagpapirma hin demand letter, ginpatay han iya ginsuktan an babayi nga collector han CARD-Isabel Branch dida han Agosto 3, ha Sitio Ilaya, Brgy. Matlang, Isabel, Leyte, alas-3:30 han kulop, Agosto 9.
Ginkilala an biktima nga hi Jane Bregildo, 21 anyos, waray asawa, collector han CARD-Isabel Branch nga taga-Matag-ob, Leyte
An suspek naman in ginkilala nga hi Piolo Mopon 20 anyos, may live-in partner, habal-habal driver ngan residente han Isabel, Leyte nga aminado han nabuhat nga krimen.
Sumala kan Plt. Sergio M. Llaneta III OIC han Isabel MPS, nagsurender an suspek ha ira dida han August 9 ngan nagsumat nga hiya an responsable ha pagkawara ngan pagkamatay han biktima dida han Agosto 3.
Gintudlok han suspek an lugar kun diin nahitabo an krimen ngan didto gihap niya ginlabog an lawas han biktima nga nakit-an lwat han mga otoridad nga aada na ha state of decomposition.
Ha dugang nga impormasyon, aada ha ₱3 mil an ginaaligar nga loan han suspek ha CARD ngan ginsusuktan hin ₱150 para han iya sinemana nga hulog. Subay pa ha iya nabuhat niya ini tungod han tarhog han biktima nga ipapapulis hiya kun diri hiya magpirma hin demand letter.
Alas-10 han aga han Agosto 3, nagpaupod an suspek ha biktima ha usa nga lugar agud manukot hin kwarta nga gagamiton unta ha iya paghulog ha CARD-Isabel Branch.
Sumigi pagsakay ha motorsiklo an biktima nga gindara ha kabubukiran nga parte han Sitio Matlang.
Pag-abot ha lugar, samtang nagkocompute an biktima han baraydan han suspek tigda nala ini niya nga ginpitlok ngan ginsuntok ha li-og hin 5 ka beses. Kataliwan, in nabunal pa an ulo hini ha bato han manluya na ini.
Gindugang han pulis nga posible ginmolestiya an biktima.
Padayon pa yana an imbestigasyon han PNP ha motibo ngan iba pa nga sirkumstansya han krimen.
Source: RMN Tacloban