Waray makalusot ha mga otoridad an usa nga lalaki nga anay barangay chairman mahuman ini makuhaan hin gin aaligar shabu ha ginbuhat nga buy-bust operation ha Brgy. A-Bonifacio, Mayorga, Leyte, dida han August 24, 2026, banda ala 1:30 han kulop.
Ginkilala an drug suspek ha alyas nga “Jun,” 51-anyos nga anay barangay kapitan, usa nga field employee, inasaw-an, ngan residente han Brgy. A-Bonifacio, Mayorga, Leyte. Dati na gihapon hiya nga naaresto dida han Nobyembre 2022.
Ha mao nga operasyon, nakumpiskar tikang ha suspek an lima (5) kapakete hin gin aaligar shabu, P500 nga boodle money, usa ka waray sulot nga pakete, ngan usa ka coin purse.
Ginbabana nga natimbang ha purluminos 20 ka gramos an narekober nga gin aaligar shabu, ngan mayada ginbabana Standard Drug Price nga P136,000.
Ginmarkahan naman ngan gin imbentaryo an mga narekober nga ebidensya ha lugar han operasyon, ha presensya han mga ginkikinahanglan nga testigo, subay ha mandato han balaud.
Igdadara an nakumpiskar nga drug evidence ha PNP Regional Forensic Group, Cam Kangleon, Palo, Leyte, samtang igtuturnover naman an suspek ha Mayorga Municipal Police Station para han sakto nga disposisyon.
Source: RMN Tacloban