Ginpatigayon sa Capitol Park and Lagoon diri sa Bacolod City sini nga Lunes, Setyembre 14, 2026 ang nationwide “Handog ng Pangulo: Serbisyong Sapat Para sa Lahat” caravan, nga naghatag sang nagkalain-lain nga serbisyo kag assistance sang gobyerno sa ginatos nga Negrense.
Ang aktibidad ginhiwat man sa nagkalain-lain nga bahin sang pungsod kabahin sang selebrasyon sang ika-69 nga kaadlawan ni President Ferdinand R. Marcos Jr. kag nagapakita sang paninguha sang administrasyon nga mapalapit ang serbisyo publiko sa katawhan kag masiguro nga ang mga programa kag benepisyo sang gobyerno mangin mas accessible sa tanan.
Kaupod nga nagpartisipar ang nagkalain-lain nga national government agencies, lakip ang Technical Education and Skills Development Authority (TESDA), Overseas Workers Welfare Administration (OWWA), Department of Labor and Employment (DOLE), Department of Agriculture (DA), Department of Social Welfare and Development (DSWD), kag Philippine Health Insurance Corporation (PhilHealth), upod ang iban pa.
Pinaagi sa mga service booth kag on-site assistance, ginhatagan ang mga residente sang kahigayunan nga makakuha sang impormasyon, serbisyo, kag suporta sa nagkalain-lain nga concern, lakip ang skills development, employment, livelihood, agrikultura, social welfare, kag health services.
Kaupod sang mga katuyuan sang caravan ang pagpalapit sang serbisyo sang gobyerno sa mga komunidad, pagpaayo sang access sa mga programa kag benepisyo, kag paghatag sang mas madasig kag responsive nga assistance para sa mga pumuluyo. Ginapaabot man sini ang mabakod nga koordinasyon sang mga ahensya kag ang people-centered nga paghatag sang serbisyo publiko.
Ang pagpatigayon sang “Handog ng Pangulo” sa Bacolod nagaserbe bilang konkreto nga tikang sa pagpasiguro nga ang serbisyo sang gobyerno yara mas malapit sa katawhan serbisyo nga inklusibo, episyente, kag para sa tanan.