Nagpabilin gihapon nga ”unhealthy” ang air Quality sa Metro Cebu apan, miubos ang konsentrasyon niini sa PM2.5 sa hangin kumpara sa mga miaging adlaw.
Kini ang gipahibalo ni Engr. Arthur Niño Calupig, air monitoring quality personnel sa Environmental Management Bureau Region 7 (EMB-7), diin matud niya nga dako ang kausaban kon itandi sa natalagdaan nga “unhealthy” nga lebel sa hangin alang sa kadaghanan sa publiko.
Apan, gipahinumdoman gihapon niya ang mga “sensitive” ug “vulnerable” nga grupo—ilabi na ang mga adunay respiratory illnesses sama sa asthma ug bronchitis—nga magpabilin gihapon nga magmatngon ug mag-amping.
Sa pagkakaron, padayon ang pag-monitor sa buhatan sa EMB-7 sa ambient air quality sa tibuok rehiyon taliwala sa gitaho nga haze ug nag-assess sa presensya, gilapdon, ug potensyal nga epekto niini sa panglawas.
Subay niini, wala pa gikonsiderar sa Cebu City ang state of emergency tungod sa haze nga nakaapekto sa Metro Cebu, kini taliwala sa nag-usab-usab nga kalidad sa hangin nga nalambigit sa mga pino nga particulate matter nga gidala paingon sa Central Visayas nunot sa nagpadayon nga sunog sa kalasangan sa Indonesia.
Matud pa nga ang gobyerno sa siyudad nagpadayon sa pagmonitor sa sitwasyon ug nag-andam na og mga lakang alang sa mga residente nga nakasinati og kalisud sa pagginhawa, lakip na ang pag-fast lane sa mga ospital sa siyudad, apan nanghinaot kini nga dili na maabot sa higayon nga madeklarar pa ang State of emergency.
Ingon man nga gianunsyo ni Mayor Nestor Archival nga kanselado gihapon ang face-to-face classes sa dakbyan sa Sugbo karong adlawa, Martes, Setyembre 8 sa tanang Basic Education levels sa pampubliko ug pribadong tunghaan.
Source: Bombo Radyo Cebu