Nagpadangat hin kadagmitan nga bulig an provincial government han Eastern Samar ha 28 ka pamilya nga nadisplace han sunog nga naglarab ha pira nga kabablayan ha Brgy. 2, Maslog, Eastern Samar, dida han September 5, 2026.
An tanan nga apektado nga pamilya in nakakarawat hin sako hin bugas, box hin mga de lata, construction materials – lakip an GI sheets ngan plywood – agud mabuligan hira nga magtikang pagtukod utro.
Para naman han mga pamilya nga totally damaged an mga panimalay, maghahatag gihapon an provincial government hin P25,000 nga financial assistance each. Samtang, an pinanysal nga hinabang liwat para han mga pamilya nga mayada partially damaged nga balay in matutudlok base ha resulta han tiarabot nga damage assessment.
Personal naman nga ginpatapod ni Gov. RV Evardone ha mga biktima han sunog an padayon nga suporta han gobyerno probinsyal.
Kaupod ni Gov. Evardone durante han relief operations hira Board Member Timmy Campomanes, BM PJ Evardone, BM Byron M. Suyot, ngan Provincial Disaster Risk Reduction Management Office head Thomas Campomanes.
Nagpaabot naman hi Maslog Mayor Septemio Bok han iya pasasalamat ha provincial government ha kadagmita nga pagresponde hini ha pagbulig ha mga naapektaran han insidente.
Labot la han bulig nga hatag han probinsya, nagpadangat gihapon an DSWD hin sleeping kits ngan family kits, lakip an P10,000 nga financial aid, ha hangyo ni Eastern Samar’s Lone District Rep. Christopher Sheen Gonzales ngan house minority floor leader ngan 4Ps partylist representative Cong. Marcelino Libanan.
Padayon naman an pag validate han Municipal Social Welfare and Development Office of Maslog han kadako han danyos han mga apektado nga mga household, kun diin ginlalauman nga masunod an dugang nga bulig kun makumpleto na an assessment ngan andam na an fire incident report tikang han Bureau of Fire Protection.
Source: RMN Tacloban