Nahimo lugod nga rescue operation an maraot nga panuyo hin usa nga lalaki nga mangawat hin wire ha San Juanico Bridge han masakpan ini han mga nagroronda nga pulis dida han Agosto 27, 2026.
Ginkilala ini nga suspek nga hi alyas “Jep-jep,” 29 anyos, scrap buyer ngan residente han Brgy. San Pedro, Sta. Rita, Samar, nga nakada han ilarom han tulay ngan nangunguha hin mga inutod nga electrical wire.
Hadto nga mga oras in Nagpapatrolya an mga personnel han 805th Maneuver Company han Regional Mobile Force Battalion 8 han ira makita an suspek nga nakada ha ilarom han San Juanico Bridge.
Tungod kay nakada ha ilarom han tulay ngan delikado an kinamumutangan han suspek, ginkahanglan pa an bulig han Tacloban City Police Office-Police Station 3 ngan Bureau of Fire Protection basi makuha hiya hin talwas.
Nakuha ha suspek an usa nga bolt cutter, screwdriver, wire cutter ngan usa nga 22 THHN electrical wire nga may kahilaba nga 24.6 metros ngan ginbabana-bana nga kantidad nga ₱14,391.
Nakuha liwat ha iya an ₱26,112 nga kwarta ha magkalain-lain nga denominasyon.
Samtang, nakakalagiw naman an ginaaligar kaupod ni “Jep-jep” nga hi alyas “Geo,” nga usa gihapon nga scrap buyer.
Gindara an suspek kaupod an mga nakuha nga gamit ngadto ha Sta. Rita Municipal Police Station para ha dokumentasyon ngan angay nga disposisyon.
Ginaandam na han kapulisan an kaso nga igpapasaka kontra kan “Jep-jep,” samtang nagpapadayon an paningkamot nga madakop an iya kaupod nga hi “Geo.”
Source: RMN Tacloban