Naglab-ot sa 858 ka armas ang boluntaryo nga ginsurrender sa mga otoridad sa Western Visayas halin Mayo 15 tubtob Hulyo 31, 2026, suno sa Police Regional Office 6.
Pinakadamo sang armas nga gin-surrender ang na-record sa Iloilo Police Provincial Office nga naglab-ot sa 410.
Ginsundan ini sang Antique Police Provincial Office nga may 129; Aklan nga may 97; Capiz, 95; Iloilo City Police Office, 59; Regional Mobile Force Battalion 6, 57; kag Guimaras nga may 11 ka armas.
Sa press conference subong nga aga kadungan sang presentasyon sang loose firearms, ginpahayag ni PBGen. Randulf Tuaño, director sang Police Regional Office 6, nga kabahin ini sang padayon nga kampanya sang kapulisan agud mapanubo ang presensya sang loose firearms sa Western Visayas kag malikawan ang paggamit sini sa krimen.
Ginapangabay man sang direktor ang publiko nga i-surrender na ang mga armas nga wala sang legal nga dokumento ukon nagakaigo nga permit, agud malikawan ang posible nga paglapas sa kasuguan kag penalidad.
Source: #GMASuperRadyoIloilo