Waray makatalwas an usa nga lalaki mahuman aksidente nga igkabungguay han ginmamanehuan nga motorsiklo an usa pa nga motorsiklo ha Brgy. Pupua, Catbalogan City, Samar, banda alas 8:30 han gab-i, dida han Agosto 8, 2026.
Dabi ha mao nga aksidente an motorsiklo nga ginmamanehuan ni alyas “Dador,” 52-anyos nga security guard, inasaw-an, ngan residente han Catbalogan City Samar.
An usa naman nga motorsiklo in ginmamanehuan ni alyas “James,” 22-anyos, sakay an back rider hini nga hi alyas “Juls,” 23-anyos, pareho mga residente han mao nga syudad.
Nagawas ha inisyal nga imbestigasyon han mga otoridad nga base ha pamahayag han mga testigo, byahe hi “Dador,” sakay an iya mortorsiklo tikang ha Brgy. 7, Catbalogan, Samar, tipakadto ha Brgy. San Vicente, Catbalogan City, Samar. Ha pag abot ha lugar han insidente, gin aaligar nga tumabok ha malaksi nga padalagan hi “Dador” ha katugbang nga lane ngan bumunggo ha motorsiklo ni “James” nga paspasay gihapon an padalagan samtang byahe tikang ha Brgy. Buri, Catbalogan City, Samar, pakadto ha Catbalogan City proper.
Tungod han pagbungguay, nag antos hin grabe nga kasamdan hi “Dador” ngan dayon nga gindara ha Samar Provincial Hospital, pero gindeklarar ini nga dead on arrival.
Samtang, nag angkon gihapon hin kasamdan hi “James” ngan an iya back rider ngan gindara ha pareho nga hospital para han pagtambal.
Subay ha pamahayag han mga testigo, an pareho nga mga drayber in gintutuuhan nga nagpakainom hin makahurubog nga irimnon ha mao nga oras han insidente.
Gindara naman an mga dabi nga sarakyan ha Catbalogan City Police Station para han sakto nga disposisyon.
Source: RMN Tacloban