Nabungkag han mga otoridad an usa nga ginaaligar drug den pinaagi hin buy-bust operation ha Brgy. Naval, Hilongos, Leyte han Agosto 6. Nagresulta ini ha pagkadakop han 10 nga katawo ngan pagrescue han upat nga menor de edad nga babayi nga nakita ha sulod han mao nga ginaaligar drug den.
Sumala ha Leyte Police Provincial Office, PDEA Southern Leyte Provincial Office an nanguna ha operasyon kaupod an Hilongos Municipal Police Station ngan iba pa nga law enforcement units.
Lakip ha mga nadakop hira alyas “Dodoy,” nga ginaaligar maintainer han drug den, “Yan,” nga ginaaligar co-maintainer, “Wan,” nga ginaaligar empleyado, ngan hira alyas “Cardo,” “Binoy,” ngan “Yoyo,” nga ginkilala nga mga bisita han drug den.
Ha operasyon, narekober an usa nga sachet han ginaaligar shabu nga subject of sale ngan 12 pa nga sachet han ginaaligar shabu nga may kabug-aton nga 19.25 gramos ngan ginbabana-bana ₱130,900 an kantidad. Narekober liwat an marked money, drug paraphernalia, mga cellphone, kwarta ngan iba pa nga ebidensya.
Gindara na an mga nadakop ngan an mga narekober nga ebidensya ha PDEA Southern Leyte Provincial Office, samtang gin-aandam an pagsaka han mga kaso tungod hin ginaaligar paglapas ha Sections 5, 6, 7, 11, 12, ngan 15 han Republic Act 9165 o Comprehensive Dangerous Drugs Act of 2002.
(Courtesy of Leyte Police Provincial Office, Photo Courtesy of CARE Media Patrol)
Source: #RMNTaclobanNews