Bilang kabahin sang padayon nga tikang para sa mas luwas, mas disiplinado, kag mas episyente nga pag-alagad sa publiko, ginlunsar sang Bacolod City Government ang Substance Abuse Awareness and Prevention Program para sa tanan nga regular nga empleyado sang syudad sa Bacolod City Government Center sang July 21, 2026 sa Bacolod City New Government Center.
Ang inisyatibo nagatuyo nga mapabakod ang kahibalo sang mga empleyado parte sa peligro kag malain nga epekto sang ilegal nga droga, samtang ginapalig-on man ang kultura sang responsibilidad, integridad, kag himsog nga pangabuhi sa sulod sang serbisyo publiko.
Ini nga programa isa sa mga prayoridad sang administrasyon ni Mayor Greg Gasataya, nga nagapati nga ang matuod nga maayo nga serbisyo nagsugod sa mga empleyado nga may maayong panglawas, matinlo nga record, kag handa nga magserbisyo nga may dedikasyon kag integridad.
Pinaagi sa padayon nga edukasyon, awareness sessions, kag prevention campaigns, ginapangandaman ang mga public servants nga makabalo sang risgo sang substance abuse kag mangin ehemplo sang disiplina kag responsableng pagpangabuhi sa komunidad.
Labaw sa tanan, ang programa nagapakita sang hugot nga handum sang Bacolod City Government nga mapabilin ang isa ka drug-free nga workplace, nga nagaresulta sa mas masaligan nga serbisyo kag mas mataas nga pagsalig sang mga Bacolodnon sa ila lokal nga panguluhan.
Sa sini nga inisyatibo, ginapamatuod sang administrasyon nga ang pagpanalipod sa kaayuhan sang mga empleyado amo man ang pagpanalipod sa kaayuhan sang tagsa ka pumuluyo sang Bacolod.