Masobra sa 100 ka mga rescuers gikan sa nagkalain-lain nga rescue organizations ang nagtililipon sa Bacolod City agud magpakita sang ila dedikasyon kag kahandaan paagi sa ginpatigayon nga Rescue March, isa ka inisyatibo nga nagapabakod sang kapasidad sang mga responders sa tion sang kalamidad kag emerhensya.
Ginpasundayag sang mga rescuers ang ila kahibalo kag abilidad sa nagkalain-lain nga rescue operations, lakip na ang fire fighting, mass casualty response, pagresponde sa vehicular accidents, collapsed building search and extraction, kag pagdumala sang hazardous materials. Ang tagsa ka simulation nagpakita sang koordinasyon, disiplina, kag kaandam nga kinahanglan sa pagluwas sang kabuhi sa tunga sang peligro.
Apang labaw pa sa mga demonstrasyon, ang pinakadaku nga katuyuan sang Rescue March amo ang pag-andam sa mga rescuers para sa pinakamabudlay nga sitwasyon kun sa diin ang mga dalan indi na maagyan kag wala na sang mahimo nga salakyan bangud sang mabaskog nga kalamidad. Sa sini nga kahimtangan, ang mga responders kinahanglan magpanglakaton samtang nagadala sang ila kagamitan agud makaabot sa mga biktima nga nagakinahanglan sang madali nga bulig.
Paagi sa sini nga inisyatibo, ginapalig-on ang pisikal nga preparasyon, mental nga kahandaan, kag teamwork sang mga rescuers agud masiguro nga bisan ano pa ang sitwasyon, indi mapunggan ang paghatag sang serbisyo sa komunidad.
Ang Rescue March ginpangunahan sang Bacolod City Disaster Risk Reduction and Management Office (DRRMO) kag gin-updan sang nagkalain-lain nga civilian volunteer rescue groups, barangay rescue teams, kag mga rescue groups halin sa Murcia, Bago City, kag Talisay City.
Nagpakigbahin man ang Office of the Civil Defense bilang suporta sa pagpalig-on sang disaster preparedness sa rehiyon.
Nagapamatuod ini nga ang epektibo nga disaster response wala lamang nagasalig sa kagamitan kag salakyan, kundi sa disiplina, kahandaan, koordinasyon, kag matutom nga serbisyo sang mga rescuer nga handa magpangabudlay kag magpanglakaton para sa kaluwasan sang ila isigkatawo. Ang Rescue March isa ka matibay nga pagpahanumdom nga ang pagpanghanda antes mag-abot ang kalamidad amo ang yabi sa pagluwas sang mas madamo nga kabuhi.