Malinampuson nga natalwas an walo nga mga indibidwal mahuman hira mawara durante han ira ginbuhat nga recon trail run ha kagurangan han Brgy. Mahayag ngan Brgy. Danao, Ormoc City, kakulop han gab-i, July 12, 2026.
Ha impormasyon nga nakuha, alas 7:45 han gab-i hira syahan nga nakagkontak hin bulig, ngan banda alas 9:30 han gab-i hira han makit-an ha kagurangan ha Danao.
Nahisumat nga ha kulop na hira nagtikang han ira trail run recon ngan naabtan na han kagab-ihon. Umabot hra ha lugar nga mayada duha ngadto ha tulo nga agi-an, hinungdan han ira kalipong ngan kawara. Waray gihapon hira dara nga mga higamit pan trail run.
Usa naman ha grupo an nakakuha hin signal ngan nakapangaro hin bulig antis malowbat an dara nga cellphone.
Mahuman madiskobre ha ira kinamumutangan, gin-rescue an walo ngan gindara ha Barangay Hall ha Danao, kataliwan gindara ha Police Station 5 ha Dolores, kun diin hira natagan hin first aid ngan ginkuhaan hin mga vital signs.
Gindara gihapon hira ha CDRRMO Operations Center ha Ormoc City Hall ngan talwas nga napauli ha ira mga tagsa tagsa nga panimalay.
Source: #RMNTaclobanNews