Dai man direktang tinamaan kan Bagyong Inday an Rehiyon Bikol, nagtao man ini nin makusog na Habagat na nagdara nin makusog na hangin asin dagko na balod na nagin dahilan kan temporaryong pagkansela kan mga biyahe sa dagat. Dahil kaini, dakul na mga pasahero asin sasakyan an na-stranded sa iba’t ibang pantalan, kaiba na an Mintac Port sa banwaan kan Cataingan, Masbate.
Bilang madaliang pagtubag sa sitwasyon, 119 na locally stranded individuals an pinagtaowan nin Ready-to-Eat Food (RTEF) packs kan Department of Social Welfare and Development (DSWD) Field Office V – Bicol tanganing may makakan habang naghuhulat sa pagbukas giraray kan mga biyahe sa dagat.
An madali na paghatod nin tabang iyo an pagtalima sa direktiba ni Pangulong Ferdinand R. Marcos Jr. na siguruhon an maagap na pagresponde sa mga naapektuhan kan kalamidad. Sa pamumuno ni DSWD Secretary Rex Gatchalian asin sa pangunguna ni Regional Director Norman S. Laurio, padagos an koordinasyon kan DSWD sa mga lokal na gobyerno asin sa iba pang katuwang na ahensya tanganing mabantayan an sitwasyon kan mga naapektuhang pamilya asin mga na-stranded na biyahero, asin maihatod dayon an saindang kaipuhang tabang.
Padagos na nakaantabay an DSWD Field Office V tanganing masiguro na mayong Bicolanong mapapabayaan sa oras kan pangangaipo, kasabay kan padagos na pagbabantay sa mga epekto kan nag-uurulang maraot na panahon.