Nakagtirok hin sumatutal 11 nga awards an Tacloban City durante han Pasidungog Ceremony nga parte han ika-128 nga anniversary celebration han Department of Agriculture, ha pagrekognisar han kontribusyon hini ha sektor han agrikultura.
Ha tema nga, “”Kawani ng Ahensya, Kaagapay ng Magsasaka’t Mangingisda, Tungo sa Masaganang Bagong Pilipinas,” nagtirok ha aktibidad an mga city and municipal agriculture offices tikang ha Eastern Visayas para tagan hin dungog an mga susbaranan nga mga programa, mga inisyatibo, ngan mga indibidwal nga nagpapadukwag han agrikultura ngan pangisdaan.
Nakakarawat an Local Government Unit han Tacloban hin Plaque of Recognition tungod han pagkomiter hini ha pagduso han mga panuyo han National Urban and Peri-Urban Agriculture Program pinaagi han mga bag-o, sustenable, ngan inklusibo nga mga inisyatibo ha agrikultura nga nagpapakusog han seguridad han pagkaon, pagpauswag han pag-ataman ha palibot, pag-aghat ha partisipasyon han komunidad, ngan pagpauswag han kaupayan han mga urban ngan peri-urban communities.
Samtang, an Tacloban City Agriculturist Office in nakakarawat gihapon hin unom nga individual awards, ha panguna ni City Agriculturist Romelo Anade, nga gin-ngaranan kumo Outstanding City Agriculturist.
An iba pa nga mga natagan hin pasidungog amo hi Judy D. Dacles komo Outstanding Agricultural Technician, ngan hira Rhodora A. Tingzon, Eliseo Cayrel, ngan Aileen J. Quimbo komo Outstanding Agricultural Technologists.
Nakakarawat gihapon hin upat nga pasidungog ngan komendasyon an mga magturutdo ngan mga estudyante tikang ha Tacloban National Agricultural School (TNAS tungod han ira aktibo nga partisipasyon ha iba-iba nga mga programa pan-agrikultura, kumo mga finalist dida han Gawad Saka 2026.
Ini nga mga pagkilala in nagpapakita han padayon nga pagkomiter han syudad ha pagpadukwag han sustenable nga agrikultura, pagpakusog han seguridad ha pagkaon, ngan pagsuporta han mga programa nga nakakabenipisyo han mga parag-uma, parapangisda, ngan mga lokal nga komunidad.
Source: RMN Tacloban