Isa ka madinalag-on nga tikang padulong sa mas episyente kag mas malapit nga serbisyo ang ginpatigayon sang Bacolod City LGU pamaagi sang Senior Citizen Center, kun sa diin 681 ka mga senior citizens ang nakabaton sang nagkalain-lain nga government services halin Hunyo 29 tubtob Hulyo 3, 2026.
Sa sulod sang lima ka adlaw nga operasyon, nagtinir kag nagtinipon sa isa ka lugar ang mga importante nga serbisyo agud indi na maglakat-lakat ang aton mga pinalangga nga katigulangan sa lain-lain nga opisina. Lakip sa mga serbisyo ang medical, dental, kag optometric consultations, pneumonia vaccination, kag YAKAP registration pinaagi sa Bacolod City Health Office.
Naghatag man sang serbisyo ang Office of the Senior Citizens Affairs (OSCA) para sa pagproseso sang senior citizen IDs, booklets, social pension, kag ladderized applications. Dugang pa gid, naghatag sang medical kag burial assistance ang AICS pinaagi sa Department of Social Services and Development–Bacolod City.
Ini nga inisyatibo nagapakita sang matutom nga paninguha sang administrasyon ni Mayor Greg Gasataya sa paghatag sang serbisyo nga mas hapos ma-access, mas organisado, kag mas mapisan para sa mga senior citizens. Paagi sa paghiusa sang nagkalain-lain nga ahensya sa isa lamang ka lugar, nalikawan ang kapoy kag dugang nga gastos sang mga benepisyaryo.
Ang Senior Citizen Center, nga isa sa mga flagship projects sang alkalde, may tinutuyo nga mapalapit ang serbisyo sa katawhan kag mapauswag ang kalidad sang pag-atipan sa mga katigulangan. Nagapamatuod ini nga ang gobyerno nga nagaserbisyo nga may kasingkasing nagahatag sang prayoridad sa dignidad, kaayuhan, kag kalipay sa tanan nga nga katawhan.
Padayon nga ginapalig-on sang siyudad ang mga programa nga nagahatag importansya sa sektor sang mga katigulangan, bangud ang ila kontribusyon sa komunidad angayan nga bayaran sang pagrespeto, pag-atipan, kag serbisyo nga ila gid matarong nga mabaton.