Nahimo na nga super typhoon ang bagyo nga yara sa gwa sang Philippine Area of Responsibility. Ginatawag ini nga Super Typhoon Bavi.
Sa latest monitoring sang Philippine Atmospheric, Geophysical and Astronomical Services Administration (PAGASA), ulihi nga nakit-an ang sentro sang bagyo sa kalayuon nga 3,005 kilometers nasidlangan sang Eastern Visayas.
Dala sini ang kabaskugon sang hangin nga 195 km/h kag pagmadlos nga tubtub sa 240 km/h.
Suno sa state weather bureau, posible nga magsulod ang bagyo sa Philippine Area of Responsibility sa Martes sang gab-i ukon sa Miyerkules sang kaagahon kag pagatawgon sa local name nga “Inday.”
Sa pinakaulihi nga tropical cyclone threat assessment sang PAGASA, mataas ang posibilidad nga mag-agi ang super typhoon malapit sa Northern Luzon sa masunod nga semana.
Bangud sini, posible nga ibatak ang Tropical Cyclone Wind Signal sa daku nga bahin sang rehiyon, lakip na ang pila ka lugar sa Central Luzon.
Suno pa sa weather bureau, temporaryo anay nga magaluya ang Habagat ukon ang southwest monsoon kag indi anay mag-apekto sa kadam-an nga parte sang pungsod. Ini bangud nga ang tropical storm Maysak ukon kilala anay bilang Bagyo Henry amo ang nagabutong sang monsoon palayo sa Pilipinas samtang nga naga-amat-amat ini palapit sa Hainan sa southern China.
Tubtub sa Martes, Hulyo 7, mabatyagan naman ang warm and humid conditions sa pungsod bangud sa monsoon break.
Ang monsoon break amo ang tyempo sa rainy season kun sa diin wala sang pag-ulan nga dal-on sang Habagat rains. Posible nga maglawig ini sang pila ka inadlaw ukon sinemana.
Halin naman sa Myerkules, ginalauman naman liwat ang Habagat bangud kay Super Typhoon Bavi.
Posible suno sa PAGASA nga indi mag-landfall ang super typhoon sa Philippine landmass apang possible nga maglabay malapit sa Batanes samtang nga palapit ini sa Taiwan sa Byernes ukon sa Sabado.
Source: #BomboRadyoIloilo