Nadiskobrehan nala nga waray na kinabuhi an usa puro pananggot nga 48-anyos matapos mahulog tikang ha usa nga lubi samtang nagkukuha hin tuba ha Sitio Bukid, Brgy. Calingcaguing, Barugo, Leyte alas-3:00 han kulop han Hunyo 28, 2026.
Ginkilala an biktima ha alyas nga “Nico,” residente han Barugo, Leyte.
Subay ha inisyal nga imbestigasyon han kapulisan, nahulog an biktima tikang ha lubi matapos matangal an uga nga palwa han lubi nga iya ginkakapotan samtang nagkukuha hin tuba.
Sumala ha live-in partner han biktima, lumakat ini ha ira balay alas-6:00 han aga basi magsangot hin lubi antes kumadto ha merkado han Carigara, Leyte para mamalit hin mga grocery items.
Han waray na ini umuli, ginpinamiling niya an biktima ha lugar nga iya kasagaran nga ginkakadtoan ngan didto niya ini hinkit-i nga waray na ini kinabuhi.
Sumala naman ha tag-iya han tuna, hi alyas “Nico” la an otorisado nga nakakasulod dinhi ngan waray na iba.
Gindara an biktima pinaagi hin rescue vehicle ngadto ha Barugo Municipal Infirmary kaupod an iya pamilya, ngan gindeklara hiya nga dead on arrival han attending physician.
Waray naman nakita nga sinyales hin foul play ha lugar han insidente.
Source: RMN Tacloban