Nadakop ha entrapment operation an usa nga aktibo nga miyembro han Philippine Coast Guard (PCG) ha bungto han Culaba, Biliran, Biyernes han kulop, Hunyo 19, tungod han ginaaligar nga pangotong ha mga parapangisda ha lugar.
Ginkilala an suspetsado nga hi alyas ”Rick”, 29 anyos, residente han Mubo, Masbate. Nadakpan ini ha sulod han opisina han Coast Guard Mobile Team ha Brgy. Virginia samtang ginkakarawat an kwarta tikang ha usa nga kolektor nga usa gihap han mga nagreklamo.
Narekober han mga otoridad tikang ha posesyon han suspetsado an marked money nga usa nga tunay nga P1,000 upod an pito ka bug-os boodle nga P1,000 . Gin-gamit gihap han mga operatiba an mga recording device agud madokumento an transaksyon.
Subay han mga report, nakarawat han CIDG an reklamo kaparte han padayon nga pangotong nga ginaaligar ginbubuhat han suspetsado.
Katapos han beripikasyon han mga reklamo, ginsundan ini hin entrapment operation nga nagresulta ha pagdakop han suspetsado.
Kakasohan an naaresto han pagtalapas han Republic Act 3019 o Anti-Graft and Corrupt Practices Act kontra han suspetsado.
Source: RMN Tacloban