Gin buhat ha Brgy Tugas, Tabango, Leyte an usa nga earthquake simulation exercise nga gin organisa han Americares Philippines usa nga international non-government organization.
An simulation in paagi agud makita ngan maapply han mga personnel han Rural Health Unit ngan han Municipal Disaster Risk Reduction and Management Office an mga training nga gin buhat nira ha bulig han Americares.
Labut ha mga RHU ngan MDRRMO personnel, bumulig gihapun ha simulation exercise an mga mulopyo han barangay tikang ha mga kabataan ngadto ha mga Senior Citizens komo nga biktima han linog
An mga barangay officials naman an nanguna ha pangolekta han mga impormasyun nga pagkikinhanglanun han mga responders sugad han pira an mga nasamaran, kun may mga namatay ba ngan nawawara.
Bulig gihapun han gin buhat nga earthquake simulation exercise an mga personnel han Tabango Municipal Police Station ngan Bureau of Fire Protection.
“Sa simulation exercise po, hindi po natin hinahanap kung ano ang kulang, kundi kung ano ang ating maidadagdag. So nakita natin, maganda po na napapractice yung coordination ng bawat agency,” subay kan Rudelly Cabutin, Americares Philippines program manager.
Dugang pa ni Cabutin nga an earthquake simulation exercise in kaparte ha syahan nga hugna han ira gin papatuman nga programa ha bungto ngan yana nga tuig in matikang an ika duha nga hugna kun diin matutuk naman ini ha “interoperability” han RHU ngan ha ira pakigsumpayan ug buliganay ha iba nga buhatan ha pag responde ha panahon hn kalamidad ngan emergency.
Nagpasalamat naman hi Tabango Mayor Ma. Carazon Remandaban nga usa an ira bungto ha mga napili nga lugar han Americares agud igpatuman han ira programa.
Durante han simulation exercise nagpasidaan ngan gin paghinumdun ni Mayor Remandaban ha mga tumambong han kaimportante han kaandaman agud madali nga makakaresponde ha mga biktima ngan makagtalwas hin kinabuhi.
An bungto han Tabango in usa han mga disaster prone municipality ha probinsya hitun Leyte – labut ha linog upod gihapun ha mga hulga ha mao nga bungto an bagyo, storm surge, babaha, ngan pagparik hitun tuna.
Source: RMN Tacloban