Puno hin pagbasol an gin-aabat hin usa nga nanay han maabtan nga waray na kinabuhi an iya 2-anyos nga anak ha usa nga buho ha Brgy. Guintigui-an, Ormoc City, kakulop, June 6.
Ha impormasyon nga nakuha, ginbilin ni alyas ‘Beth’ nanay han bata, an iya anak ha iya bayaw tungod nga mamamalit ine hin school supplies ha Ormoc City proper.
Han pag-uli han nanay, nahipausa hiya han diri na makita an iya anak. Dayon hiya nangaro hin bulig ha mga amyaw ngan residente han lugar, nga nagburublig dayon ha pagpinamiling han bata.
Didto na nakit-an an menor-de-edad ha sulod han usa nga gin-ukab nga buho nga may tubig. Han ginkuha an bata, waray na ini kinabuhi.
Ha inisyal nga imbestigasyon, gintutuohan nga nahulog an bata ha buho samtang
nagmumulay ha hirani nga lugar.
Nagtutuo an pamilya nga aksidente an natabo ha biktima.
Source: RMN Tacloban