Gipakita sa Local Government Unit (LGU) sa Cebu City ang iyang pasalig sa pagpalig-on sa kahandam ug kaluwasan sa komunidad pinaagi sa pagpahigayon sa Oplan Pakigsandurot Capacity Building niadtong Hunyo 3, 2026 sa 9th Floor Executive Building.
Gitambongan kini sa mga barangay kapitan, barangay tanod, ug uban pang personnel sa komunidad nga mitambong sa mga lecture ug praktikal nga demonstrasyon kabahin sa emergency preparedness, disaster response, ug public safety awareness.
Usa sa mga nag-unang bahin sa programa mao ang Emergency Readiness ug Basic Life Support Training nga gipahigayon sa CCDRRMO, ingon man ang diskusyon sa bomb threat identification ug demonstrasyon sa hustong handcuffing ug restraint techniques sa SWAT Team.
Matod sa mga opisyal, lakip si Vice Mayor Thomas Osmeña ug uban pang representante sa ahensya sa gobyerno, ang maong kalihokan makatabang sa pagpalig-on sa koordinasyon ug kahandam sa komunidad aron mapadayon ang kalinaw, kahapsay, ug kaluwasan sa dakbayan.