Napulo nga indibidwal an gindakop han mga otoridad durante han operasyon kontra iligal nga online sabong o e-sabong ha sulod han Hindang Amusement Center ha Brgy. Poblacion 2, Hindang, Leyte, alas-7:02 han gab-i, dida han Mayo 29, 2026.
Sumala ha impormasyon tikang ha kapulisan, nakakarawat hira hin impormasyon durante ha ginpapadayon nga iligal nga e-sabong ha mao nga bulangan.
Agud makakompleto han ebidensya para han kaso, usa nga police officer an nakarehistro hin account ha usa nga online betting platform an pumusta hin nagkakantidad P500 pinaagi han GCash alas-5:57 han kulop.
Alas-6:46 han gab-i, nagbuhat hin operasyon an kapulisan ngan nadiskobrehan han mga otoridad an iba-iba nga information and communications technology (ICT) equipment nga konektado ha online betting platform, nga nagtutugma ha live CCTV footage nga gin-iistream online.
Tungod hini, napatud-an nga may ginbubuhat nga iligal nga e-sabong ha lugar nga pagtalapas ha Presidential Decree 1602, kasumpay ha Executive Order No. 9 ngan Republic Act 10175 o an “Cybercrime Prevention Act of 2012.”
An napulo nga nadakpan amo hira alyas “Atan,” 50 anyos; “Sab,” 64 anyos; “Ganor,” 48 anyos; “Waning,” 68 anyos nga barangay opisyal; “Tatang,” 48 anyos; “Chang,” 33 anyos; “Perok,” 39 anyos; “Yeye,” 24 anyos; “Kitig,” 24 anyos; ngan “Bads,” 26 anyos nga ICT technician han cockpit operation.
Narekober ngan ginkompiska han mga operatiba an usa nga Globe at Home modem router, usa nga TP-Link power router, usa nga desktop computer set nga ginagamit sugad server, usa nga CCTV DVR, ngan duha nga CCTV cameras.
Katapos han operasyon, gindara an mga arestado ngan an mga nakompiskar nga ebidensya ngadto ha Hindang Municipal Police Station para ha dokumentasyon ngan husto nga disposisyon samtang ginpapadayon an pag-andam han mga kaso kontra ha ira.
Source: RMN Tacloban