May kasadya kag pagpasalamat nga ginpahayag ang kapin 80 ka mga presidente sang senior citizens association halin sa 61 ka barangay sang Bacolod City matapos ang ila courtesy visit kay Greg Gasataya antes ang pagpagwa sang ila quarterly honorarium.
Bilang pagpamatuod sang padayon nga pag-atipan sang lokal nga panguluhan sa kaayuhan sang mga katigulangan, ginpadupluhan na subong nga tuig ang ila binulan nga allowance halin ₱500 pakadto sa ₱1,000, nga ginahatag kada tatlo ka bulan bilang suporta sa ila matutom nga serbisyo kag pagpanguna sa komunidad.
Ang sini nga dugang nga bulig nagapakita sang paghatag bili sang syudad sa dako nga kontribusyon sang mga lider sang senior citizens nga padayon nga nagaalalay kag nagagiya sa kapin 12,000 ka rehistrado nga katigulangan sa Bacolod.
Suno sa mga opisyal sang syudad, dako ang papel sang mga lider sa pagpasiguro nga ang mga programa, benepisyo kag serbisyo sang gobyerno makaabot sa tagsa ka senior citizen sa ila tagsa ka barangay.
Gindugang man nga sa tion sang pagbukas sang bag-o kag mas maayo nga Senior Citizen Center, mas mapalapnag pa gid ang serbisyo, pag-atipan kag mga programa para sa mga katigulangan agud mas mangin mahapos kag mas akma ini sa ila kinahanglanon.
Ginpaathag naman ni Mayor Gasataya ang matibay nga panindugan sang lokal nga gobyerno sa paghatag prayoridad kag espesyal nga pag-atipan sa mga senior citizen bilang pagpasalamat sa ila sakripisyo, kaalam kag padayon nga kontribusyon sa komunidad.
Sa Bacolod, ang pagrespeto kag pagpalangga sa mga katigulangan indi lamang obligasyon kundi isa ka responsibilidad nga ginapabakod pa gid sang syudad adlaw-adlaw.