Nag antos hin kasamdan an usa nga senior citizen mahuman ini pagtigbason han usa pa gihapon nga senior citizen ha Brgy. Camporog, Villaba, Leyte, banda alas 9:00 han aga, kakulop nga adlaw, Mayo 26, 2026.
Ginkilala an biktima nga hi alyas “Miring,” 60-anyos, waray trabaho, ngan residente han Brgy. Camporog, Villaba Leyte.
An suspek naman in ginkilala ha alyas nga “Noy,” 63-anyos nga parag-uma, ngan residente han pareho nga barangay.
Banda alas 10:00 han aga kakulop, Mayo 26, personal nga pumakadto an biktima ha Villaba Municipal Police Station ngan ginsumat nga hiya in gin aaligar gintigbas gamit hin sundang ha luyo nga parte han iya ulo.
Dayon liwat hiya nga gindara han mga personales han mao nga buhatan ha Villaba Rural Health Unit para han kadagmitan nga pagtambal, ngan ginkadto ha Villaba Community Hospital para han dugang nga pagtambal.
Samtang, pira ka minutos an naglabay, umabot liwat an suspek ha Villaba MPS para boluntaryo nga magsurender, diri dara an armas nga gin gamit ha insidente. Yana in nakapailarom ha hiya ha kustodiya han buhatan para han sakto nga disposisyon.
Source: RMN Tacloban