Madamo nga mga gun owners gikan sa pribado kag government sectors ang nagbuylog sa una nga adlaw sang License to Own and Possess Firearms (LTOPF) kag Firearms Registration Caravan nga ginpatigayon sa lobby sang Bacolod City Government Center sang Mayo 20.
Ang tatlo ka adlaw nga caravan nga pagahiwaton tubtob Mayo 22 isa ka mabaskog nga inisyatibo sang Regional Civil Security Unit–Negros Island Region (RCSU-NIR) sa idalum sang Civil Security Group sang Philippine National Police, sa pagpakita sang mas malapit, mas paspas, kag mas episyente nga serbisyo publiko para sa mga rehistrado nga gun owners sa rehiyon.
Sa bulig kag mabaskog nga pagpakig-angot sang Bacolod City Government sa liderato ni Mayor Greg Gasataya, ginpadali kag ginpahapos ang proseso sang aplikasyon kag renewal sang permits kag lisensya sang mga nagapanag-iya sang armas. Paagi sini, wala na kinahanglan maglakat pa sing malayo ang mga aplikante agud makuha ang ila kinahanglanon nga dokumento kag serbisyo.
Ginpabutyag sang PNP Civil Security Group-NIR nga ang amo nga aktibidad kabahin sang padayon nga kampanya sang kapulisan sa responsableng pagpanag-iya sang armas, pagpatuman sang balaod, kag pagpalig-on sang seguridad sa komunidad. Pinaagi sa pagdala sang serbisyo mas malapit sa katawhan, ginapakita sang PNP nga ang ila mandato indi lamang sa pagpatuman sang kasuguan kundi sa pagserbisyo nga may kadasig kag kaakig.
Padayon naman nga ginapasalamatan sang Bacolod LGU ang kooperasyon sang PNP Civil Security Group-NIR sa paghatag sang accessible kag organisado nga serbisyo nga nagahatag kahamugaway sa publiko kag nagapalig-on sang pagsalig sang katawhan sa gobyerno kag kapulisan.