Bacolod City, Negros Occidental — Mas ginpalapit sang Regional Civil Security Unit Negros Island Region ukon RCSU NIR ang ila serbisyo sa publiko paagi sa pagdala sang “LTOPF & Firearms Registration Caravan” sa Ayala Mall, Bacolod City sa Mayo 20 tubtob 22, 2026.
Ang nasambit nga caravan nagatuyo nga buligan ang mga firearm owners sa Bacolod City kag mga nagkalapit nga lugar nga mapadasig kag mapasayon ang pagproseso sang ila licensing kag registration requirements, samtang ginapalig-on man ang responsable kag legal nga pagpanag-iya sang armas.
Lakip sa mga serbisyo nga available amo ang bag-o kag renewal sang License to Own and Possess Firearms (LTOPF), firearms registration kag renewal, neuro-psychiatric examination, drug test, National Police Clearance, gun safety seminar, kag notary services.
Gina-abiabi ang tanan nga aplikante nga magdala sang kompleto nga dokumento agud mangin mas paspas kag hapsay ang pagproseso sang ila aplikasyon. Ginaasahan man nga makaserbisyo ang caravan sa masobra 150 ka aplikante kada adlaw sa pamaagi nga “first come, first serve.”
Ang inisyatiba nga ini nagapakita sang padayon nga paninguha sang Philippine National Police nga mapalapit ang serbisyo sa komunidad kag mapalig-on ang kampanya para sa responsable nga paggamit kag pagpanag-iya sang armas.