BACOLOD CITY — Isa ka police sergeant ang napatay samtang duha pa ka kapulisan ang napilasan matapos gin-alegar nga ginpang-atake sang drug suspect kag iya iloy gamit ang binangon sa buy-bust operation sa Sitio Talaptap, Barangay Talaptap, La Castellana, Negros Occidental sang Lunes sang gab-i.
Ang napatay amo si Police Master Sergeant Davy Carampatana, samtang napilasan sanday Police Captain Michael Muñez kag Police Corporal Gerson Guache.
Target sang operasyon si Edward Acupan, 41, nga gin-alegar nagbatok sa pagdakop kag nag-atake sa mga operatiba. Ang iya iloy nga si Delia Acupan, 68, gin-alegar nga nag-upod man sa pagpanaksak sa mga pulis.
Narekober sa operasyon ang ginapatihan shabu nga nagabalor P47,600, buy-bust money, mga armas nga may talim kag drug paraphernalia.
Suno kay PRO-Negros Island Region acting director Romano V. Cardiño, bayani si Carampatana bangud sang iya sakripisyo sa serbisyo publiko.
Source: Inquirer.Net