Nag antos hin kasamdan an usa nga lalaki mahuman ini tigda la pagbun-on ha Brgy. Poblacion Norte, San Isidro, Northern Samar, kakulop nga adlaw, Mayo 10, 2026, alas 2:10 han kaagahon.
Ginkilala an biktima nga hi alyas “Paul,” 24-anyos, residente han Rosario, Northern Samar.
Samtang, an suspek in ginkilala ha alyas nga “Chan,” 34-anyos nga taho vendor, residente han Allen, Northern Samar.
Ha nakuha nga impormasyon, nag iinom an biktima ngan an suspek durante hin usa nga dance event han nagkamayada hira halipot nga istorya.
Ha waray mahisabti nga rason, tigda nga kumuha hin kutsilyo an suspek ngan nagproyba pagbuno ha biktima ha tiyan. Nahimo naman han biktima madepensahan an iya kalugaringon, pero naigo la gihapon han kutsilyo an iya hita.
Dayon nga nangaro hin bulig an biktima, samtang kumalagiw naman an suspek tikang ha lugar ngan ginlabay an iya armas ha dagat.
Dagmit nga gindara an biktima ha Allen District Hospital para han pagtambal. Samtang, pinaagi naman han ginbuhat nga follow-up operation han mga nagresponde nga kapulisan han San Isidro Municipal Police Station, naaresto an suspek ngan gindara ha mao nga buhatan para han sakto nga disposisyon.
Source: RMN Tacloban