Nagpabutyag sang kabalaka ang IBON Foundation may kaangtanan sa kakulangan sang mga health worker sa pungsod nga nagaapekto sa serbisyo medikal para sa publiko.
Suno kay Sonny Africa, Executive Director sang Ibon Foundation, iya ginpahayag nga may pila ka mga lugar sa Pilipinas nga lakip sa may mataas nga poverty incidence apang kulang man sa numero sang mga doktor, nars kag iban pa nga health workers.
Siling pa ni Africa, tuman nga apektado ang health system sang pungsod bangud indi lamang kulang ang mga pasilidad kundi may kakulangan man sa kalidad sang serbisyo nga ginahatag sa mga pumuluyo.
Dugang pa sini, bangud sa limitado nga benepisyo kag oportunidad sa Pilipinas, mas damu nga health workers ang nagapili nga mag-abroad ukon mangin empleyado sa iban nga pungsod agud makapangita sang mas mataas nga sweldo kag mas maayo nga kondisyon sa trabaho.
Dugang pa sang natungdan, kinahanglan tutukan sang gobyerno ang pagpasangkad sang health system paagi sa dugang nga suporta sa mga health worker, pagpaayo sang mga pasilidad kag paghatag sang mas maayo nga serbisyo agud mapanami ang pag-atipan sa pumuluyo.