Dead on arrival ha hospital an usa nga babayi nga senior citizen mahuman ini aksidente nga matudlok hin motorsiklo ha kahilab-an han national highway ha Brgy. Caridad, Baybay City, Leyte, kakulop, July 17, alas 5:30 han kulop.
Ginkilala an biktima nga hi “Berlin,” 73-anyos nga balo, residente han Baybay City Leyte.
An motorsiklo naman in ginmamanehuan ni “Ayan,” 34-anyos, single, residente han Agusan Del Sur.
Ha inisyal nga imbestigasyon, byahe an motorsiklo tikang ha Baybay City Proper pakadto ha Brgy. Caridad, Baybay City. Ha pag abot ha lugar han insidente, nawarayan hin kontrol an drayber han iya sarakyan ngan aksidente nga natudol an biktima nga hadto nga mga oras, in nagbabaktas ha ligid han kalsasa.
Tungod han panhitabo, nag antos hin kasamdan an drayber ngan biktima ngan dayon nga gindara ha Baybay City Immaculate Conception Hospital (BCICH) para han pagtambal, pero gindeklarar nga dead on arrival an senior citizen nga biktima han nag atendir nga doktor.
Gindara naman an motorsiklo ha Baybay City Police Station, Sub-Station 2 para han sakto nga disposisyon.
Source: RMN Tacloban