Nag angkon hin kasamdan an usa nga menor de edad nga lalaki mahuman ini tigda la nga pagbun-on gamit hin bu-ung hin botelya ha usa nga Restobar ha Brgy. Canticum, Calbiga, Samar, kanina han ala 1:30 han kaagahon, June 29, 2026.
Ginkilala an biktima nga hi alyas “Jay,” 17-anyos nga lalaki, residente han Pinabacdao, Samar.
An suspek in ginkilala liwat ha alyas nga “Mark,” 34-anyos nga parag-uma, single, ngan residente han Calbiga, Samar.
Nagawas ha inisyal nga imbestigasyon han mga otoridad nga nag iinom an biktima ngan an suspek ha magkalain nga lamesa nga upod an magkalain nga mga upod ha mao nga Resto Bar. Durante hini, dumaop an suspek ha biktima ngan gin-akbayan ini.
Diri maiha in kumuha ngan gin-buung han suspek an usa ka botelya hin irimnon ngan tigda nga ginbuno an biktima gamit an matarom nga buung han mao nga botelya, kun diin naigo an biktima ha wala nga parte han iya liog.
Dayon liwat nga gindara an biktima ha Samar Provincial Hospital (SPH) Catbalogan City para han kadagmitan nga medikal nga atensyon.
Mahuman naman matudlok han witness nga hi alyas “Nere”, 20 anyos nga staff han nasabi nga resto bar, malinampuson nga naaresto an suspek ngan gindara ha custodial facility han Calbiga Municipal Police Station para han sakto nga disposisyon.
Source: RMN Tacloban