Isang graduate mula sa University of Cebu (UC) School of Medicine ang nakapasok sa top 5 ng March 2023 Physician Licensure Exam (PLE).
Sa rating na 87.67%, nakuha ni Anthony Palaran Acenas ang ika-limang puwesto kasama si Isabella del Castillo mula sa University of Santo Tomas.
Ito ang pangatlong beses na nakapagtala ng topnotcher ang UC School of Medicine, kasunod nina Cy Johann Kent Romuga noong 2021 at Mark Johnuel Duavis noong 2022.
Sina Romuga at Duavis ay ginawaran ng mga bagong kotse ng Presidente at Chairman ng UC na si Augusto Go para sa kanilang mga nagawa.
Sa isang panayam noong Biyernes, Marso 17, sinabi ni Dr. Melfer Montoya ng UC School of Medicine na ang tagumpay ng kanilang mga nagtapos ay dahil sa suporta ng administrasyon, sa hilig at inobasyon ng mga guro, at sa likas na katalinuhan at motibasyon ng mga mag-aaral sa kanilang sarili.
Kinumpirma ni Rudy Aviles, Director ng Student Cultural Services, na makakatanggap din si Acenas ng bagong sasakyan at cash incentive mula sa UC.
Ang UC School of Medicine ay nagtala ng 91.67% passing rate para sa March PLE, kung saan 11 sa 12 test-takers ang pumasa.
Ayon sa Professional Regulation Commission (PRC), kabuuang 1,573 sa 2,887 examinees ang nakapasa sa PLE.
Nanguna sa 2023 PLE si Aira Cassandra Suguitan Castro mula sa Mariano Marcos State University-Batac na may rating na 89 percent.