Tatlong bayan sa lalawigan ng Leyte ang idineklarang malaya sa mga banta ng New People’s Army (NPA) sa ilalim ng State of Stable Internal Peace and Security Condition (SIPSC).
Sinabi ni Brig. Gen. Noel Vestuir, Commander ng 802nd Infantry Brigade ng Philippine Army, sa isang panayam nitong Huwebes na pormal nang nabawi ang mga bayan ng Hilongos, Isabel, at Merida nito lamang Hunyo 12.
“Sa deklarasyon ng mga bayan ng Hilongos, Isabel, at Merida bilang Stable Internal Peace and Security Conditions (SIPSC) ay bunga ito ang pagkakaisa sa pagsisikap na wakasan ang lokal na armadong labanan ng komunista at mapanatili ang isang mapayapa at ligtas na mamamayan para sa kapayapaan ng mga bayang ito,” sabi ni Vestuir.
Hinikayat niya ang mga lokal na pinuno, partikular na ang mga opisyal ng nayon, na ipagpatuloy ang kanilang pagsisikap para sa kapayapaan.
“Ang aking panawagan sa komunidad ay huwag magpalinlang sa Communist Party of the Philippines – NPA at mga kaalyado nito at huwag na silang muling payagang makatungtong sa kanilang mga nayon,” dagdag ni Vestuir.
Pinasalamatan din ng kani-kanilang alkalde ng mga bayan ang lahat ng stakeholders na nag-ambag sa pagkamit ng SIPSC sa kanilang mga lugar, dahil ito ay makakaakit ng mga pamumuhunan.
Muling pinagtibay ng Philippine Army, Philippine National Police, at Department of the Interior and Local Government ang kanilang malakas na suporta at pangako sa pagpapanatili ng kapayapaan at seguridad sa mga bayang ito.
Ang isang bayan ay maidedeklara lamang insurgency free sa ilalim ng SIPSC kung walang aktibidad ng NPA sa lugar sa nakalipas na dalawang taon at walang residenteng kinikilalang aktibong armadong rebelde.
Nabanggit ni Vestuir na ang pagkamit ng isang estado ng matatag na kapayapaan at seguridad ay resulta ng pakikipagtulungan at pagsisikap ng mga lokal na pamahalaan at kanilang mga komunidad.
Noong Mayo 17, ang mga bayan ng Palompon at Matag-ob sa Leyte ay idineklarang ganap na malaya sa impluwensya ng NPA, ang unang dalawang munisipalidad sa lalawigan na nagkamit ng ganoong katayuan.
Panulat ni Adi
Source: PNA