Nagluntad ang duha ka sunod sunod nga engkwentro sa tunga sang 79th Infantry “Masaligan” Battalion batok sa Communist Terrorist Group (CTG) sa Barangay Minautok sa banwa sang Calatrava kagahapon, Abril 6, 2026.
Base sa report, nagluntad ang una nga engkwentro alas-8:35 sang aga sa Sitio Pinyahon sa nasambit nga lugar kun sa diin ginapatihan mga remnants sang Northern Negros Front (NNF), Komiteng Rehiyon-Negros ang imbolbado sa insidente.
Samtang ang ikaduha naman nga engkwentro ang nagluntad alas-8:45 nga nagluntad naman sa bahin sang Sitio Proper sa amo gihapon nga Barangay.
Suno sa 79th IB, pito ka mga armado nga mga lalaki ang na-engkwentro sa idalum ni Roger Fabillar ukon Alyas Jhong nga nagaserbe bilang Commanding Officer sang Northern Negros Front sang New People’s Army (NPA).
Sa report sang militar, naglawig sa kapin lima ka minutos ang pagbayluhanay sang lupok kun sa diin lunsay mga nagpalagyo sa nagkalain-lain ang direksyon ang mga katapo sang ginapatihan NPA.
Nagapadayun man sa gihapon ang pursuit operations sang militar sang mga nagpalagyo nga mga rebelde.
Source: #DYHBnews