Patay ang kinikilalang Street Level Individual drug personality matapos pagbabarilin sa San Juan Baybay St. Brgy. 6, San Carlos City, Negros Occidental, alas 8:30 ng gabi noong Enero 10, 2024.
Ang namatay na drug personality ay kinilalang si Weber Mondragon alyas “Danny”, 51-anyos, residente ng Calatrava, Negros Occidental.
Ayon sa report ng San Carlos City PNP, alas-8:30 ng gabi ng makatanggap sila ng balita na may pamamaril na nangyari sa nasabing lugar na agad naman nila itong nirespondehan.
Ayon pa sa imbestigasyon ng mga kapulisan ng San Carlos, nakarinig daw ang mga tao malapit sa pinangyarihan ng krimen ng dalawang magkasunod na putok ng baril, nang pinuntahan nila ang lugar, nakita nila na nakahandusay na si Mondragon.
Kalakip pa dito, tama sa ulo ang naging dahilan ng pagkamatay ni Mondragon.
Narekober sa crime scene ang dalawang basyo ng bala ng kalibre 45 na pinaghihinalaang ginamit sa pagpatay sa biktima.
Sa ngayon ay patuloy ang imbestigasyon ng mga kapulisan kung ano ang posibleng dahilan ng pamamaril para sa mabilis na pagkakadakip ng hindi pa nakikilalang suspek na kaagad nakatakas pagkatapos ng insidente.