Pormal nga gilusad ang re-branding sa usa ka pribadong hospital facility sa Sitio Malinao, Barangay Agus, Lapu-Lapu City karong adlawa, Pebrero 11, 2026.
Kini nga ospital mao ang Mactan Optimal Medical Center o MactanMed nga gipanag-iya sa Mount Grace Hospitals Inc. kun MGHI pinangulohan sa ilang president nga si Jose Santiago Dela Cruz Jr.
Kagahapon lang sa alas 11:00 sa buntag, gisugdan ang maong kalihukan pinaagi sa usa ka programa diin nahitabo usab ang ilang Brand Revelation ingon man ang paghatod og mga mensahe gikan sa mga head sa MactanMed.
Gawas niini, nihimo usab og Hospital Tour diin gipakita sa mga tigdumala sa maong ospital ang ilang mga facility sama sa rooms, nursing station, outpatient department ug uban pa.
Gihimo usab ang ribbon cutting ug ang pagpa-blessing sa ilang bag-ong mga unit sama sa Oncology Unit, Physical and Rehabilitation Medicine Unit, Endoscopy Unit, Acute Stroke Unit, Molecular Pathology Unit ug Hemodialysis Unit.
Sa press conference nga gihimo, namahayag si MGHI President Jose Santiago Dela Cruz, Jr. nga gipaneguro sa MactanMed nga mahatod ang labing luwas, segurado ug dekalidad nga serbisyong medikal ngadto sa mga Sugboanon ug sa tanan nilang mga pasyenti.
Nagsugod og operate ang naasoyng hospital niadto pang Nobyembre 11, 2024 human mapalit sa Mount Grace Hospitals Inc. ang maong pasilidad nga gidumala sa laing hospital company.
Dugang ni Dela Cruz nga ang nahitabong re-branding nagpasabot lamang og evolution diin mas hugtan pa nila ang ilang paghatod og serbisyong medikal ngadto sa katawhan inabagan sa ilang mga medical professionals ug uban pang mga staff.
Source: #DYHPRmnCebu612