Sang pipila ka mga bulan nga naglabay, halos puro nalang rally kag demonstrasyon ang atun nakit-an sa balita bangud sang tuman nga isyu sang kurapsyon sa halos tanan nga mga proyekto sang aton gobyerno. Nagpanguna sa listahan ang mga kontroberisyal nga flood control projects sa lain-lain nga parte sang aton pungsod.
Ini nga mga isyu mas nangin viral pa gid bangud sang mga nagasunud-sunod nga mga kalamidad kag bagyo nga nangin kabangdanan sang mga pagbaha sa mga residential community sa iban nga mga probinsya.
Sini lamang nagligad semana, kadamo sang mga nagkalamatay sa aton mga kasimanwa partikular na sa Negros Occidental kag sa Cebu bangud sang tuman kakusog nga hagupit ni Bagyong Tino. Pero indi na ini bag-o sa aton. Halos kada tuig kita nakaeksperiensya sang mga bagyo bangud sang aton nga heograpiya. Pero ngaa daw naglala pa ang epekto subong kumpara sang mga nagliligad nga tuig.
Ini nga problema indi lang tanan sala sang pila ka mga pulitiko kundi sang kadam-an. Kung ang tanan mangin responsable nga mga pumuluyo kag buligan ang gobyerno nga ireport kag indi pasugtan ang tanan nga mga ilegal nga aktibidad nga nagguba sang aton nga kinaiyahan, pwede gid nga malikawan ta ang malala nga epekto sang mga kalamidad.
Labaw sa tanan, ang pagboto sang inchakto ang pinaka-importante nga butang nga dapat tamdan sang tanan nga mga Pilipino. Indi na naton kinahanglan magsagi-rally kung ang mga ginaboto ta maayo, indi corrupt kag may tagipusoon sa serbisyo publiko. Kita tanan may karapatan magpili sang aton gusto nga mga lider, tane indi lang kita magboto bangud kay naimpluwensyahan kita kundi nakita gid naton ang maayo nga mga katangian sang isa ka lider.
Tane mangin-leksyon ini sa aton tanan, nga may dako gid kita nga responsibilidad nga magpili sang mga nagakabagay nga lider sang aton mga lunsod, probinsya kag pungsod. Mga lider na may ara tinlo nga intensyon nga magserbisyo sang iya mga kasimanwa kag magpanguna sang kampanya sang honest and good governance.