Kasong ‘multiple murder’ ang atubangon ni Police Staff Sgt. Bonifacio Saycon human kini nipusil-patay og usa ka babaye ug tulo ka mga kabaro niiini gawas sa usa ka restor bar sa Sibulan, Negros Oriental niadtong Sabado sa gabii, Enero 9, 2026.
Si Saycon gipaubos na sa inquest proceedings kagahapong adlawa, Enero 12, human kini boluntaryong nitahan ngadto sa Tanjay City Police Station sa Negros Oriental human sa gihimong krimen.
Ang mga biktima nailhan nga silang Sheila Mae Dinawanao, ang babaye nga unang gipusil sa suspek, ug gisunod pagpusil ni Saycon ang tulo sa mga kabaro niini lakip na ang hepe sa Sibulan Police nga si Police Capt. Jose Edrohil Cimafranca, Police Senior Master Sgt. Tristan Chua, ug Patrolman Rey Albert Temblor.
Sa inisyal nga imbestigasyon sa kapulisan, nahitabo ang insidente sa usa ka resto bar sa naasoy’ng dapit dihang gialegar nga nakainom na ang suspek nga pulis ug nagmauy kini nga miresulta sa pagpusil niini ngadto kang Dinawanao.
Dihang ni-respondi na ang kapulisan sa Sibulan sa maong panghitabo ug gisakay na sa awto ang suspek, gikataho nga kalit lang namusil na usab si Saycon ngadto sa iyang mga kabaro diin tulo niini ang nakalas dayon sibat sa lugar sa nahitaboan.
Human siya nitahan sa kapulisan sa Tanjay City, gitugyan usab ni Saycon ang iyang ‘issued firearm’ samtang padayong gipalawman sa kapulisan ang ilang imbestigasyon sa nahitabong insidente subay sa kausaban na sa liderato sa kapulisan sa Negros Oriental ug Sibulan.
Source: DYHP RMN Cebu