Negros Occidental– Magahatag sang recognition of arrival kasubong man sang token of appreciation ang Negros Occidental government sa mga Negrense boxers nga sanday Rogen Ladon kag Ian Clark Bautista nga lunsay nakakuha sang gold medal sa patag sang boxing sa 31st SEA Games sa Hanoi, Vietnam.
Suno kay Governor Eugenio Jose “Bong” Lacson, ginacongratulate sini sanday Ladon kag Bautista bangud sa honor nga gindala nila sa probinsa kag pungsod apisar sang limitado nga resources.
Suno kay Lacson, ang boxing ang isa sa mga sports nga pagahatagan sang prayoridad sa Negros Occidental kag ini ang nagapadayon nga proseso bangud humalin sang una, nagaproduce na sang mga kampeon ang probinsya sa international games.
Pagalantawon naman sang gobernador kun makahatag sang incentive ang probinsya apang suno sa iya, dako na nga balor ang ginapaabot sang mga atleta sa Philippine government kag may mga opisyales man sang probinsya nga handa magcontribute.
Suno diri, apisar nga indi tuman ka dako, magahatag ang probinsya sang token of appreciation kag recognition of arrival.
Gindayaw sini ang duha kag gintawag nga inspirasyon sang mga Negrense samtang gincongratulate man sang gobernador ang pamilya sang nasambit nga mga boksidor.
Wala naman sang pagpangduha-duha ang alkalde sang Bago City nga makuha ni Ladon ang bulawan sa SEA Games.
Suno kay Mayor Nicholas Yulo, ginalauman na sini nga mangin kampeon si Ladon bangud iya nakit-an ang training, sakripisyo kag abilidad sang atleta.
Ginpahayag man sini nga ang ciudad ang wala nagauntat sa pagsuporta sang mga programa sa sports ilabi na sa boxing kun sa diin kilala man ang Bago City.
Ginpanginbulahan sini si Ladon kasubong man ang iya pamilya sa kadalag-an nga naagom sang atleta indi lamang para sa ciudad kundi para sa pungsod.