Ginatan-aw sang probinsyal nga gobyerno sang Iloilo ang posibilidad sang pagdeklara sang state of calamity bangod sa padayon nga pagsaka sang presyo sang fuel nga nagapabug-at sa sektor sang transportasyon, negosyo, kag pangabuhian sang mga pumuluyo sa probinsya.
Ginpangunahan ni Governor Arthur Defensor Jr. ang pagmandu sa Provincial Community Defense Cluster nga maghimo sang masinsinan nga assessment agud mahibaluan kon kinahanglan na ang pagpatuman sang emergency powers. Ini nga tikang ginlunsad matapos ang meeting sang cluster sang Marso 25, kun sa diin ginpatuman man ang Executive Order No. 34-A nga nagalayon sang fuel kag energy conservation sa residential, commercial, industrial kag transport sectors. Ang amo nga kautusan nagasuporta sa Memorandum Circular No. 114, Series of 2026 sang Office of the President.
Suno kay PDRRMO chief Cornelio Salinas, ginakolekta na sang probinsya ang nagkalain-lain nga datos pareho sang ihap sang apektado nga public utility vehicles (PUVs), presyo sang fuel sa merkado, kag iban pa nga economic indicators agud matimbang kon may basihan ang pagdeklara sang state of calamity. Ginpahayag man niya nga ini nga sitwasyon isa ka bag-o nga pagsulay bangod indi ini pareho sang naandan nga kalamidad nga ginabase sa natural nga kalamidad pareho sang bagyo, linog, kag El Niño.
Padayon nga ginapanawagan sang probinsyal nga gobyerno ang kooperasyon sang publiko sa pagpatuman sang fuel conservation measures samtang ginahulat ang resulta sang assessment nga magahulag sang masunod nga tikang sang lokal nga panguluhan.
Source: Panay News