Inaprubahan ng Eastern Visayas Regional Development Council (RDC) ang pitong proyekto na inirekomenda ng iba’t ibang lokal na pamahalaan para sa pondo sa ilalim ng Energy Regulations (ER) No. 1-94 ng Department of Energy (DOE).
Ayon kay National Economic Development Authority Regional Director Meylene Rosales, Vice Chairperson ng RDC, nito lamang Lunes, Setyembre 30, ang mga proyektong nagkakahalaga ng PHP13.15 milyon ay naaprubahan noong Setyembre 19.
Kabilang dito ang isang community-based adaptation project sa Basey, Samar; isang solar-powered pumping system sa Hinabangan, Samar; at pagbili ng delivery truck para sa direktang pagbebenta ng copra at iba pang produkto ng mga magsasaka sa San Julian, Eastern Samar.
Inaprubahan din ang pag-repurpose ng basura sa eco-bricks sa Sulat, Eastern Samar; supply at installation ng solar streetlights sa Biliran province; layer production at marketing project sa Jipapad, Eastern Samar; at installation ng municipal solar street lights sa Hinundayan, Southern Leyte.
Sinabi ni Rosales na ang mga proyekto ay isasagawa sa oras na maitatag ang mga memorandum of agreement sa pagitan ng mga lokal na pamahalaan at mga kumpanya ng enerhiya.
Ang pondo ng ER 1-94 ay nagmumula sa one-cent per kilowatt-hour na kontribusyon mula sa mga benta ng kuryente ng mga kumpanya ng enerhiya.
Limampung porsyento ng mga pondong ito ay inilaan para sa mga host communities upang pondohan ang mga proyekto sa kabuhayan at pagpapaunlad ng komunidad, reforestation, watershed management, at climate change resiliency, pagpapahusay ng serbisyong pangkalusugan, at pagpapahusay ng mga pampublikong pasilidad,” ani Rosales.
Hanggang Setyembre 10, 2024, naitala ng RDC ang isang regional share na PHP13.34 milyon mula sa mga prodyuser ng kuryente, kabilang ang Energy Development Corporation, Sulu Electric Power and Lights, Inc., Taft Hydroenergy Corporation, at Isabel Ancillary Services Co. Ltd.
Ang pagpili ng mga proyekto ay nakabatay sa mga pangunahing pamantayan, kabilang ang eligibility (30 porsyento), inaasahang epekto (30 porsyento), feasibility at sustainability (20 porsyento), at pagsunod sa Eastern Visayas Regional Development Plan 2023-2028 at Regional Development Investment Program (20 porsyento).
Panulat ni Cami
Source: PNA